مەملەكەت باسشىسى ۇسىنعان «رۋحاني جاڭعىرۋ» باعدارلاماسىن جۇزەگە اسىرۋدا بۇقارالىق اقپارات قۇرالدارى ماڭىزدى ءرول اتقاراتىندىعىن ەسكەرە وتىرىپ, جۋرناليست كادرلاردى دايارلاۋدىڭ ساپاسىن ارتتىرۋ ماسەلەسىن كۇن تارتىبىنە شىعاراتىن كەز جەتتى دەپ سانايمىز. وسىعان وراي پرەمەر-ءمينيستردىڭ ورىنباسارى ە.دوساەۆقا دەپۋتاتتىق ساۋالمەن مىناداي ۇسىنىستار جولدادىق:
1) بولاشاق جۋرناليستەردى دايارلايتىن نەگىزگى وقۋ ورىندارى بولىپ تابىلاتىن ءال-فارابي اتىنداعى قازۇۋ مەن ل.ن. گۋميلەۆ اتىنداعى ەۇۋ جۋرناليستيكا فاكۋلتەتتەرىنىڭ الەۋەتتەرىن بارىنشا تولىق تا, ءتيىمدى پايدالانۋ قاجەت. اتالعان فاكۋلتەتتەر رۋحاني جاڭعىرۋ قوزعالىسىنىڭ العى شەبىنەن كورىنىپ, مەملەكەتتىك اقپاراتتىق ساياساتتى تابىستى جۇزەگە اسىراتىن قوعامدىق پىكىر كوشباسشىلارىن دايارلايتىن, ءبىر كەزدەگىدەي بەدەلى وتە جوعارى, ەليتالىق دەڭگەيدەگى جۋرناليست كادرلار ۇستاحانالارىنا اينالدىرىلسا ارتىق بولماس ەدى. ولار ەڭ الدىمەن مەملەكەتتىك باق-تارعا جانە مەملەكەتتىك ورگانداردىڭ ءباسپاسوز قىزمەتتەرىنە قاجەتتى جوعارى بىلىكتى مامان كادرلاردى دايارلاۋعا مامانداندىرىلعانى ءجون دەپ بىلەمىز. وسىعان وراي اتالعان ۋنيۆەرسيتەتتەرگە «جۋرناليستيكا» ماماندىعى بويىنشا مەملەكەتتىك ءبىلىم بەرۋ گرانتتارىن ماقساتتى تۇردە ءبولۋ تەتىگىن قاراستىرۋ قاجەت.
بۇعان قوسا, جوعارىدا اتالعان ەكى ۇلتتىق ۋنيۆەرسيتەتتىڭ جۋرناليستيكا فاكۋلتەتتەرى مەن مەملەكەتتىك اقپارات قۇرالدارىنىڭ اراسىنداعى بايلانىس بارىنشا نىعايتىلىپ, بولاشاق جۋرناليستەردىڭ وندىرىستىك پراكتيكادان ءوتۋى جۇيەلى تۇردە جولعا قويىلسا يگى. بۇل مەملەكەتتىك باق-تار باسشىلارىنىڭ دارىندى جاس جۋرناليستەردى دەر كەزىندە تانىپ-ءبىلىپ, جۇمىسقا قابىلداپ, شىعارماشىلىق ۇجىمداردى تىڭ كۇشپەن نىعايتۋلارىنا مۇمكىندىك بەرەر ەدى;
2) قازىر ەلىمىزدە 2547 گازەت پەن جۋرنال, 115 تەلەارنا, 65 راديو, 196 اقپارات اگەنتتىگى مەن جەلىلىك باسىلىم بار. ولارعا قوسا, ورتالىق جانە وڭىرلىك اتقارۋشى ورگانداردىڭ ءباسپاسوز قىزمەتتەرىنە دە بىلىكتى جۋرناليستەر قاجەت. بۇگىنگى كۇنى جۇمىس بەرۋشىلەر «ەڭبەك» ەلەكتروندى ەڭبەك بيرجاسى ارقىلى وزدەرىندە بوس تۇرعان 133 جۋرناليستىك قىزمەت ورنىن ۇسىنىپ وتىر. شىن مانىندە بىلىكتى جۋرناليستەرگە سۇرانىس ودان دا كوپ ەكەندىگى انىق. سوندىقتان دا «جۋرناليستيكا» ماماندىعى بويىنشا بولىنەتىن مەملەكەتتىك ءبىلىم بەرۋ گرانتتارى سانىنىڭ جىلدان-جىلعا كەمىتىلۋ ۇردىسىمەن كەلىسۋ قيىن. ماسەلەن, 2016-2017 وقۋ جىلىنا 90 گرانت بولىنگەن بولسا, ۇستىمىزدەگى وقۋ جىلىندا ونىڭ سانى 70-كە دەيىن ازايتىلعان. وسىعان وراي اقپارات جانە كوممۋنيكاتسيالار مينيسترلىگى رەسپۋبليكاداعى باق-تاردىڭ جانە مەملەكەتتىك ورگانداردىڭ ءباسپاسوز قىزمەتتەرىنىڭ بىلىكتى جۋرناليست كادرلارىنا سۇرانىستارىن ناقتى زەرتتەپ ءبىلىپ, «جۋرناليستيكا» ماماندىعى بويىنشا بولىنەتىن گرانتتار سانىن كوبەيتۋ جونىندە ۇسىنىس ازىرلەگەنى ءجون;
3) قازىرگى كەزدە جوعارى وقۋ ورىندارىن بىتىرگەن جاس جۋرناليستەر ايماقتارعا بارعىلارى كەلمەي, كوپشىلىگى قالالاردا قالىپ ءجۇر. سونىڭ سالدارىنان, اسىرەسە سولتۇستىك وڭىرلەردە اۋداندىق گازەتتەردى, نەگىزىنەن, جاستارى الپىستان اسىپ, جەتپىسكە جاقىنداعان قارت جۋرناليستەر شىعارىپ ءجۇر. الداعى ۋاقىتتا ولاردىڭ ورىندارىن كىمدەر باساتىنىن ويلاستىرعانىمىز ابزال. سوندىقتان دا اۋداندىق گازەتتەرگە جۇمىسقا ورنالاسۋعا كەلىسىم بەرەتىن جاس جۋرناليستەردى «ديپلوممەن – اۋىلعا!» الەۋمەتتىك باعدارلاماسىنا ەنگىزۋدى دە ۇسىنامىز.
كارىباي مۇسىرمان,
ءماجىلىس دەپۋتاتى
